ಜೈ ತುಲುನಾಡ್(ರಿ) ಕಾಸ್ರೋಡು ಎಗ್ಗೆದ ನಿಲೆಟ್ ಮರಪಂದಿ ಆಟಿ
ಜೈ ತುಲುನಾಡ್(ರಿ) ಕಾಸ್ರೋಡು ಎಗ್ಗೆದ ನಿಲೆಟ್ ಮರಪಂದಿ ಆಟಿ ಪನ್ಪುನ ಲೇಸ್ 27-07-2025 ತಾನಿ ಕಾಸ್ರೋಡು ಕರಂದಕ್ಕಾಡ್‌ದ.ಬಿಲ್ಲವ ಸಮಾಜ ಸೇವಾ ಸಂಘದ ಚಾವಡಿಡ್ ನಡತ್ಂಡ್. ಶ್ರೀ ನಾರಾಯಣ ಗುರು ಮಂದಿರದ ಎದುರು ಜೈ ತುಲುನಾಡ್ ದ ಪದುಕೆರ್ ಅಭಯದ ಮದಿಪು ನಟ್ಟೊಂದು ಬೊಕ್ಕ ಬಿಲ್ಲವ ಸೇವಾ ಸಂಘದ ಗುರ್ಕಾರ್ಲು ಶ್ರೀ ಕೆ ರಘು ಮೀಪುಗುರಿ ಲೇಸ್ ನ್ ತುಡರ್ ಅರ್ಲಾದ್ ಉದಿಪನ ಮಂತೆರ್.ಅಯಿರ್ದ್ ಬೊಕ್ಕ ಜೋಕುಲೆನ ಭಾಷಣ ಪಂತ ನಡತ್ಂಡ್,ಅಯಿಟ್ ಎಲ್ಯ ಜೋಕ್ಲೆನ ಪಾಲ್‌ಡ್ ಧ್ಯೇಯ ವರ್ಕಾಡಿ ಸುರೂತ, ಸಂಸ್ಕೃತಿ ಕುಂಬ್ಳೆ ರಡ್ಡನೆ ಬೊಕ ದರ್ಶಿತ್ ಕೆ ಆರ್ ಮೂಜನೆ, ಮಲ್ಲ ಜೋಕ್ಲೆ ಪಾಲ್‌ಡ್ ನಿಮಿಷಾ ಎಸ್.ಬಟ್ಟಂಪಾರೆ ಸುರೂತ, ದೃಶ್ಯ ಡಿ.ಬಟ್ಟಂಪಾರೆ ರಡ್ಡನೆ,ವರ್ಷಾ ಎಸ್ ಬಟ್ಟಂಪಾರೆ ಮೂಜನೆ ಇನಾಮು ಗೆಂದ್ಯೆರ್, ಬೊಕ್ಕ ನಡತಿನ ಮುಗಿತಲದ ಲೇಸ್ ಎಗ್ಗೆದ ಗುರ್ಕಾರ್ಲಾಯಿನ ಶ್ರೀಮತಿ ಕುಶಲಾಕ್ಷಿ.ವಿ.ಕುಲಾಲ್ ಕಣ್ವತೀರ್ಥರೆನ ಗುರ್ಕಾರ್ಮೆಡ್ ನಡತ್ಂಡ್.ಶ್ರೀ ರಘು ಮೀಪುಗುರಿ ಗುರ್ಕಾರ್ಲು ಬಿಲ್ಲವ ಸೇವಾ ಸಂಘ (ರಿ) ಮೇರ್ ಉದಿಪನದ ಪಾತೆರಡ್ ಜೈ ತುಲುನಾಡ್ ಕಾಸ್ರೋಡು ಎಗ್ಗೆ ಈ ಲೇಸ್‌ನ್ ಬಿಲ್ಲವ ಸೇವಾ ಸಂಘದ ಚಾವಡಿಡ್ ಮನ್ತಿನೆಕ್ ಸಂತೋಸುವುಂಡು.ತುಲುನಾಡ್ದ ಪರಪೋಕು ಪರತಿರಿನ್ ನನದ ಜೋಕುಲೆಗ್ ಒರಿತ್ ಕೊರ್ಪುನವು ನಮ್ಮ ಜಬದಾರಿ,ಈ ನಿಲೆಟ್ ಜೈ ತುಲುನಾಡ್ ಕೂಟದ ಬೇಲೆ ಪುಗರೊಡಾಯಿನಾಂದ್ ಪಂಡೆರ್. ಬೊಕೊರಿ ಮಲ್ಲ ಬಿನ್ನೆರಾದ್ ಬತ್ತಿನ ಯಕ್ಷಗಾನ ಬೊಕ ಪೆರಿಯ ರಂಗಕಲಾವಿದೆರಾಯಿನ ಶ್ರೀ ವಾಸು ಬಾಯಾರ್ ಎಡ್ಡೆಪ್ಪುದ ಮದಿಪು ಕೊರೊಂದು ಯಕ್ಷಗಾನ ಬೊಕ ಸಿನೇಮಾ ರಂಗೊಡು ಪುಗಾರ್ತೆ ಪಡೆಯೆರೆ ತುಲು ಭಾಷೆ ಬೊಕ ತುಲುವೆರೆನ ಬೆರಿ ಸಾಯ ಮಸ್ತುಂಡು.ಜೈ ತುಳುನಾಡ್ ಕೂಟದ ಕುಲು ತುಲು ಲಿಪಿ ನ್ ತುಳುವೆರೆ ಇಲ್ಲ್ ಇಲ್ಲಡೆ ಎತ್ತಾಯೆರೆ ಬೋಡಾದ್ ಪ್ರತಿಪಲ ಬಯಕಂದೆ ತುಲು ಲಿಪಿ ಕಲ್ಪಾವುನ ಎಡ್ಡೆ ಬೇಲೆ ಮಂತೊಂದುಲ್ಲೆರ್,ತುಲು ಭಾಷೆಗ್ ಪ್ರಾದೇಶಿಕ ಭಾಷೆ ಬೋಕ ಎನ್ಮನೇ ಪರಿಚ್ಛೇದಡ್ ತಾನ ಮಾನ ತಿಕ್ಕೊಡು ಪಂಡೆರ್. ಜೈ ತುಲುನಾಡ್ (ರಿ) ಪೆರಿಯ ಕೂಟದ ಗುರ್ಕಾರ್ಲಾಯಿನ ಶ್ರೀ ಉದಯ ಪೂಂಜಾ ತಾರಿಪಾಡಿ ಗುತ್ತು ತುಲು ಭಾಷೆದ ಪೆರ್ಮೆ ಗೆಲ್ಮೆದ ,ಪರಪೋಕುದ ಬಗೆಟ್ ಪಾತೆರ್ಯೆರ್.ತುಲು ಭಾಷೆ ಬರವುದ ಭಾಷೆ ಆದ್ ತಿಕ್ಕಂದಿನೆರ್ದಾವರ ಇನಿ ಪರ ಭಾಷೆನ್ ನಮ ನಿಮುರ್ತಿ ಇಜ್ಯಂದೆ ಕಲ್ಪೊಡಾದ್ ಬೈದ್ಂಡ್.ಶಾಲೆಲೆಡ್,ಕೆಲವು ಸರ್ಕಾರಿ ಕಛೇರಿಲೆಡ್ ತುಲು ಪಾತೆರೆರೆ ಬಲ್ಲಿ ಪನ್ಪುನ ಕಟ್ಟ್‌ಪಾಡ್ ಮಂತ್‌ದ್ ನಮ್ಮ ಅಪ್ಪೆ ಭಾಷೆ ಬರೆಲುಲೆಕ ಮಂತ್‌ದೆರ್.ನಮ್ಮ ಅಪ್ಪೆ ಭಾಷೆ,ಪುಟ್ಟಿಮಣ್ಣ್‌ನ್ ಒರಿತ್ ಬುಲೆಪೆರೆ ನಮ ಒಟ್ಟಿಗೇವೊಡು ಪಂಡೆರ್.ಜೈ ತುಲುನಾಡ್ ಕಾಸ್ರೋಡು ಎಗ್ಗೆದ ಪದುಕೆರ್,ತುಲು ಬರವುದಾರಾಯಿನ ಶ್ರೀ ಉಮೇಶ್ ಶಿರಿಯ ಮರಪಂದಿ ಆಟಿದ ತಿರ್ಲ್ ಪೊರ್ಲ್ ನ್ ಪಂಡೆರ್.
ಕೇರಳ ಡ್ ಬರವು ಕಲ್ಪುನ ಜೋಕುಲು ಅಕ್ಲೆನ ಅಗತ್ಯೊಗು OEC,OBC ಸರ್ಟಿಫಿಕೇಟ್ ದೆಪ್ಪುನಗ ತುಲು ಅಪ್ಪೆ ಭಾಷೆ ಪಾತೆರುನ ಕೆಲವು ಜಾತಿದ ಪುದರ್ ತಪ್ಪಾದ್ ಬತ್ತಿನೆರ್ದಾವರ ಜಾತಿ ಸರ್ಟಿಫಿಕೇಟ್ ದೆಪ್ಪೆರೆ ಆವೊಂದಿಜ್ಜಿ,ಉಂದೆನ್ ಸರಕಾರೊದ ಗುಮನಗ್ ಕನತ್‌ದ್ ಸರಿಮನ್ಪಾವುನ ನಿಲೆಟ್ ತುಲುವೆರ್ ಮಾತಾ ಒತ್ತಟ್ಟಾವೊಡೂಂದು ಗುರ್ಕಾರ್ಮೆದ ಪಾತೆರೊಡು ಶ್ರೀಮತಿ ಕುಶಲಾಕ್ಷಿ ಕಣ್ವತೀರ್ಥ ಪಂಡೆರ್.
ಲೇಸ್‌ಗ್ ಬತ್ತಿನ ಮಲ್ಲ ಬಿನ್ನೆರೆಗ್ ಮಿತ್ತರ್ಮೆಡ್ ಮಾನಾದಿಗೆ ಮಂತ್ಂಡ್,ಪಾರ್ದನ ಪಂಡಿನ ಅಶ್ವಿನಿ ಕಾರಿಂಜ ಬೊಕ ತುಲು ಲಿಪಿ ಕಲ್ಪಾದಿ ವಿನೋದ ಪ್ರಸಾದ್ ರೈ ಮುಕ್ಲೆಗ್ಲಾ ಮಾನಾದಿಗೆ ಮಂತ್ಂಡ್, ಪಂತೊಡು ಗೆಂದಿನಕ್ಲೆಗ್ ಇನಾಮು ಪಟ್ಟ್ಂಡ್.
ಬಿಲ್ಲವ ಸೇವಾ ಸಮಾಜ ದ ಜೋಕ್ಲೆನ ಸುಗಿಪುದೊಟ್ಟಿಗೆ ಸುರುವಾಯಿನ ಲೇಸ್‌ನ್ ಎಗ್ಗೆದ ಕಾರ್ಯಂತೆರಾಯಿನ ಶ್ರೀ ಹರಿಕಾಂತ ಕಾಸ್ರೋಡು ಎದ್ಕೊಂಡೆರ್.ಎಗ್ಗೆದ ಪಣವುದ ಪಾಲವೆರಾಯಿನ ಶ್ರೀ ಯಜ್ಞೇಶ್ ಬೊಕ ಪದುಕೆರಾಯಿನ ಪ್ರೇಮಾ ಎಂ ಕಣ್ವತೀರ್ಥ ಪಂತೊಗು ತೀರ್ಪುಗಾರೆರಾದಿತ್ತೆರ್,
ಪದ ರಂಗಿತ,ಸಬಿ ಸವಾಲ್ ಲೇಸ್‌ನ್ ರಂಗೇರಾಂಡ್.ಆಟಿದ ಒನಸ್ ತೆನಸ್ ಬಡವು ಸನಿತ್ಂಡ್.
ಪದುಕೆರಾಯಿನ ಶ್ರೀ ಉತ್ತಮ್, ಶ್ರೀ ಚಂದ್ರಶೇಖರ ತಲಪಾಡಿ, ಶ್ರೀಮತಿ ರಾಜಶ್ರೀ ತಲಪಾಡಿ,ಕಿರಣ್ ತುಲುವ, ಶ್ರೀ ಪ್ರಕಾಶ್ ಶೆಟ್ಟಿ ಕುಡ್ಲ, ಶ್ರೀಮತಿ ಸವಿತಾ ಕರ್ಕೇರಾ, ಕುಮಾರಿ ಚಿತ್ರಾಕ್ಷಿ , ಶ್ರೀ ನವೀನ್ ಚಿಪ್ಪಾರು .ಬೆರಿತಾಂಗ್ ಕೊರ್ಯೆರ್. ಶ್ರೀಮತಿ ವಿನೋದ ಪ್ರಸಾದ್ ರೈ ಕಾರಿಂಜ ಬೊಕ ಶ್ರೀ ಶ್ರೀನಿವಾಸ ಆಳ್ವ ಕಳತ್ತೂರು ಲೇಸ್ ಸುದಾರಿಕೆ ಮಂತೆರ್..ಎಗ್ಗೆದ ಒತ್ತು ಗುರ್ಕಾಲಾಯಿನ ಶ್ರೀ ಪ್ರವೀಶ್ ಕುಲಾಲ್ ಬೀರಿಕುಂಜ ಸೊಲ್ಮೆ ಸಂದಾಯೆರ್.
Comments
Post a Comment