ಜೈ ತುಲುನಾಡ್ (ರಿ.) ಸುರು ಆವೊರ್ದುಂಬು

 ಅವು 2012......

ಆ ಪೊರ್ತುಡು ಫೇಸ್‌ಬುಕ್‌ದಂಚಿನ ಸಾಮಾಜಿಕ ಜಾಲತಾಣೊಡು ತುಳುತ್ತ ಸೊರೊಕುಲು ಲಕ್‌ದುಂತಿನ ಪೊರ್ತು... ತುಳು ಪರ ವಿಚಾರೊಲೆಗ್ ಸಾಮಾಜಿಕ ಜಾಲತಾಣೊಡು ಬಲ ತಿಕ್‌ದ್ ತುಳುತ್ತ ವಿಚಾರ ಎಸ್‌ಯು ಪಣಿಯಾಡಿರ್ದ್ ಬೊಕ್ಕ ಮಲ್ಲ ಮಟ್ಟ್‌ಡ್ ಕೇನರೆ ಸುರು ಆಯಿನ ಪೊರ್ತು. ವಿಶೇಷ ಪಂಡ ಈ ಸೊರ ಸುರು ಆಯಿನಿ ಜವನೆರೆರ್ದ್..... ಯುವ ಪೀಳಿಗೆರ್ದ್...... ತುಳು ಬಾಸೆಗ್ ಸ್ಥಾನಮಾನ ತಿಕ್‌ದಿಜಿ ಪನ್ಪಿನ ವಿಚಾರ ಜನರ್ದ್ ಜನಕ್ ಮುಟ್ಟೊಂದು ಬತ್ತ್ಂಡ್. 8ನೇ ಪರೀಚ್ಛೇದದ ವಿಚಾರೊದ ನಡುಟು ರಾಜ್ಯ ಬಾಸೆ ಸ್ಥಾನಮಾನ ವಿಚಾರಲ ದುಂಬು ಬತ್ತ್ಂಡ್? ತುಳು ಬಾಸೆಗ್ ಭಾಷಾವಾರು ಪ್ರಾಂತ್ಯಾ ತಿಕ್ಕಾಂದಿನೇರ್ದಾವ ಕಾರ್‌ದ ಮುದೆಲ್ಡೇ ಆತಿನ ಅನ್ಯಾಯೊಲು ಬೊಲ್ಪುಗು ಬತ್ತ್ಂಡ್. ಸಾಮಾಜಿಕ ಜಾಲತಾಣೊಲೆಡ್ ಲೇಖನೊಲೆನ್ ಜವನೆರ್ ಬರೆಯರೆ ಸುರು ಮಲ್ತೆರ್. ಜನಜಾಗೃತಿದ ಮಲ್ಲ ಅಭಿಯಾನನೇ ಸುರು ಆಂಡ್...............

ಈತ್ ಮಾತ ಆನಗ.... ಸಾಮಾಜಿಕ ಜಾಲತಾಣ ಬುರ್ದು ಪಿದೈಡ್ ದಾಯೆಗ್ ಜವನೆರ್ ಒಟ್ಟಾದ್ ಪೊರ್ಂಬಾಟ ಮಲ್ಪರೆ ಬಲ್ಲಿ? ಪನ್ಪಿನ ವಿಚಾರ ಜವನೆರ್ ಪಾತೆರೊಂದು ಇತ್ತೆರ್. ಆಂಡ ಜವನೆರೆನ್ ಸಾಮಾಜಿಕ ಜಾಲತಾಣ ಬುರ್ದು ಪಿದೈ ಬರ್ಪೆರಾ ಪ್ರಶ್ನೆಗ್ ಉತ್ತರ ತಿಕ್ಕೊಂದು ಇತ್ತಿಜಿ. 

*ಅವು 2014....*

ಮುಂಬೈಡ್ ಇತ್ತಿನ ಪ್ರಶಾಂತ್ ಸಾಲ್ಯಾನ್... ಪನ್ಪಿನಾರ್ "ಎನನ್" ಸಂಪರ್ಕ ಮಲ್ತೆರ್. "ತುಳುತ್ತ ವಿಚಾರೊಡು ಈತ್ ಮಾತ ವಿಚಾರೊಲು ಆವೊಂದುಂಡಾ.... ಉಂದೆಕ್ ದಾದಾಂಡಲಾ ಮಲ್ಪೊಡು... ಯಾನ್ ಊರುಗು ಬರ್ಪೆ, ದಾದಾಂಡಲಾ ಮಲ್ಪುಗ, ತುಳು ಸಂಘ ಬೋಡಾಂಡ ಒಂಜಿ ಮಲ್ಪುಗ" ಪಂಡೆರ್. 

ಆಂಡ ಎಂಕ್ ಅಂತೂ ಊರುಡು ಸಂಘ ಮಲ್ಪುನ ವಿಚಾರೊಡು ಆಸಕ್ತಿ ಇತ್ತಿಜಿ. ಐಕ್‌ಲಾ ಕಾರಣ ಉಂಡು.

ಯಾನ್ ಪಿಯುಸಿ ಕಲ್ತೊಂದುಪ್ಪುನ ಪೊರ್ತುಡು ಫೇಸ್‌ಬುಕ್‌ದಂಚಿನ ಮಾಧ್ಯಮೊಡು ತುಳುತ್ತಕುಲು ಮಾತ ಭಾವನೆನ್‌ಲಾ ಕನ್ನಡೊಡು ವ್ಯಕ್ತ ಮಲ್ತ್ ಬರೆನಗ. ದಾಯೆಗ್ ತುಳುವೆರ್ ತುಳು ಬುರ್ದು ಕನ್ನಡ‌ ಬಾಸೆಡ್ ಬರೆಪೆರ್. ದಾಯೆಗ್ ಅವೆನ್ ತುಳುಟು ಬರೆಪುಜೆರ್? ಇಂಚಿನ ಕೆಲವೊಂಜಿ ಪ್ರಶ್ನೆಲು ಎನ್ನ ಮಂಡೆಡ್ ಬಲಿತ್ತೊಂದು ಇತ್ತ್ಂಡ್.

ಐಕ್ ದಾದಾಂಡಲಾ ಮಲ್ಪೊಡು ಪನ್ಪಿನ ಕಾರಣೊಗು "ಆರ್ಕುಟ್‌"ಡ್ ಮಲ್ತ್ ಇತ್ತಿನ "ತುಳು ಪಾತೆರ್ಗ ತುಳು ಒರಿಪಾಗ" ಪನ್ಪಿನ ಒಂಜಿ ಕೋಪೆನ್ ಫೇಸ್‌ಬುಕ್‌ಡ್ ಸುರು ಮಲ್ತೆ. ಐಟ್ ತುಳು ಮಾತ್ರ ಪಾತೆರೊಡು ಪನ್ಪಿನ ನಿಯಮೊನು ಜಾರಿಗ್ ಕನತೆ... ಈ ಕೋಪೆಗ್ ಮಲ್ಲ ಮಟ್ಟ್‌ಡ್ ಬೆರಿತಾಂಗ್ ಕೊರಿನಕುಲು ದುಬೈ ಬೊಕ್ಕ ಮುಂಬೈಡ್ ಉಪ್ಪುನ ತುಳುವೆರ್. ಐಟ್‌ಲಾ ದುಬೈಡ್ ಉಪ್ಪುನ ತುಳುವೆರ್.  ಮುಲ್ಪರ್ದ್ ಬೊಕ್ಕ ಈ ಒಂಜಿ ಕೋಪೆ ಮಸ್ತ್ ಜನಪುಗರ್ತೆ ಪಡೆಂಡ್ ಐಟ್‌ಲಾ ದುಬೈಡ್ ಉಪ್ಪುನ ರಿತೇಶ್, ಪ್ರೇಮ್‌ಜಿತ್, ಶೋಭಿತಾ ಈ ಮೂವೆರ್ ಫೇಸ್‌ಬುಕ್‌ರ್ದ್ ಪಿದೈ ಕನತ್ತ್‌ದ್ ಈ ಕೋಪೆನ್ ದುಬೈಡ್ ಸ್ಥಾಪನೆ ಮಲ್ತೆರ್. ಒಂಜಿ ವರ್ಷ ಬುರ್ದು ಊರುಡುಲಾ ಈ ಒಂಜಿ ಕೋಪೆನ್ ಯಾನ್ ವಿದ್ಯಾರ್ಥಿ ಆದುಪ್ಪುನಗನೇ ಊರುದ ತುಳುವೆರೆನ ಬೆರಿಸಾಯೊಡು ಮುಲ್ಕಿಡ್ ಸುರು ಮಲ್ತ‌. ಆಂಡ ದಾದ ಮಲ್ಪುನು ಊರುಡು ಉಂದೆನ್ ದುಂಬು ಕೊನರೆ ಸಾಧ್ಯ ಆಯಿಜಿ. ಜನಕ್ಲೆನ್ ರಂದ್‌ದ್ ಲೆತ್ತ್ಂಡಲಾ ಬರೊಂದಿಜ್ಜಂಡ್. ಯಾನ್ ಆ ಪೊರ್ತುಡು ವಿದ್ಯಾರ್ಥಿ ಆಯಿನೇರ್ದಾವರ ಎನ್ನ ಮಿತಿ ಮೀರ್ದ್ ಅವೆನ್ ಬುಲೆಪಾಯರೆ ಸಾಧ್ಯ ಆಯಿಜಿ. ಆಂಡ ಒಂಜಿ ಕುಸಿ ಉಂಡು. ದುಬೈಡ್ ಇತ್ತೆಲಾ ಈ ಕೂಟ ತುಳು ಪರ ಬೇಲೆ ಮಲ್ತೊಂದುಂಡು.  ಊರುಡು ಧರ್ಮ, ಜಾತಿ, ಪಕ್ಷ ಬುರ್ದು ಜನಕುಲು ತುಳು ವಿಚಾರದಂಚಿ ಗಮನ ಕೊರೊಂದು ಇತ್ತಿಜೆರ್. ನಾಲ್ ಜನ ಸಾಹಿತಿಲೆಗ್ ಬುಡುಂಡ ತುಳು ಏರೆಗ್‌ಲಾ ಬೊಡ್ಚಿತ್ತ್ಂಡ್. ಇಲ್ಲಡ್ ಪಾತೆರ್ವತ ಯಾವು ಪನ್ಪಿನ ಭಾವನೆನೇ ಇತ್ತ್ಂಡ್. 

ಉಂದೇ ಕಾರಣೊರ್ದು ಮುಂಬೈದ ಪ್ರಶಾಂತ್ ಸಾಲ್ಯಾನ್ ಎನನ್ ಸಂಪರ್ಕ ಮಲ್ತ್ ಕೂಟ ಮಲ್ಪುನ ವಿಚಾರ ದುಂಬು ದೀನಗಲಾ ಎಂಕ್ ಉಮೇದ್ ಇತ್ತಿಜಿ. ತುಳುವೆರ್ ರಾಜಕೀಯ ಪಕ್ಷ, ಧರ್ಮ, ಜಾತಿಗ್ ಕೊರ್ಪಿನ ಉಮೇದ್ ತುಳು ಸಂಘಗ್ ಕೊರ್ಪುಜೆರ್ ಪನ್ಪಿನ ವಿಚಾರ ಉಂದೆರ್ದ್ ದುಂಬೇ ಅರ್ಥ ಆದ್ ಇತ್ತ್ಂಡ್. ಒವ್ವೇ ತುಳು ಸಂಘಡ್‌ಲಾ ಸಂಖ್ಯಾ ಬಲ ಇಜ್ಜಿ. ಅವ್ವೊಂಜಿ ತಾಲೂಕು,‌ ಊರುಗು ಸೀಮಿತ ಆದೇ ಉಂಡು ಪನ್ಪಿನ ಸತ್ಯಲಾ ಎಂಕ್ ಗೊತ್ತು ಇತ್ತ್ಂಡ್.

 ಪ್ರಶಾಂತ್ ಸಾಲ್ಯಾನ್ ತುಳು ಸಂಘಟನಾ ವಿಚಾರೊಡು ಸುರು ಬತ್ತಿನೇರ್ದಾವರ ಅರೆಗ್ ಈ ಬಗೆಟ್ ಮಸ್ತ್ ಉಮೇದ್ ಇತ್ತ್ಂಡ್. ಆರ್ 3 ವರ್ಷರ್ದುಂಬು "ತುಳುರಾಜ್ಯ ದಾಯೆಗ್, ನಂಕ್ ತುಳು ಜಿಲ್ಲೆ ಯಾವು" ಪಂದ್ ಪನೊಂದು ಇತ್ತೆರ್. ಆಂಡ ಸಾಮಾಜಿಕ ಜಾಲತಾಣದ ನಿರಂತರ ಜನಜಾಗೃತಿರ್ದ್ ಆರ್ ಬದಲಾಯೆರ್... ತುಳುಕು ಆವೊಂದುಪ್ಪುನ ಅನ್ಯಾಯ ಅರೆಗ್ ಗೊತ್ತಾಂಡ್. ಅವೆರ್ದ್ ಬೊಕ್ಕ ಆರ್ ತುಳುಕು ದಾದಾಂಡಲಾ ಮಲ್ಪೊಡು ಪಂದ್ ಎನ್ನಿಯೆರ್. ಆರ್ ಅವೆರ್ದ್ ಬೊಕ್ಕ ಎನನ್ ನಿರಂತರ ಸಂಪರ್ಕ ಮಲ್ತೊಂದು ತುಳುತ್ತ ವಿಚಾರೊಡು ಚರ್ಚೆ ಮಲ್ತೊಂದು ಇತ್ತೆರ್. ಕಡೆಕ್ ಒಂಜಿ ಕೂಡು ಪಟ್ಟಾಂಗ (ಮೀಟಿಂಗ್) ಲೆಪ್ಪುಗ ಪನ್ಪಿನಡೆಗ್ ಮುಟ್ಟ ವಿಚಾರ ಬತ್ತ್ಂಡ್. ಆಪಿನ ಆಪುಂಡು ದೇವೆರ್ ದೀಲಕ ಆಪುಂಡು ಪಂದ್ ದೈವ ದೇವೆರೆನ್ ದುಂಬು ಕೂಡು ಪಟ್ಟಾಂಗ ಲೆತ್ತ್ಂಡ್. ಅವ್ವೇ 10 ಆಗಸ್ಟ್ 2014.

*ಕೂಡು ಪಟ್ಟಾಂಗರ್ದ್ ಒಂಜಿ ವಾರ ದುಂಬು*

ಕೂಡು ಪಟ್ಟಾಂಗ ದೀಯ ಸರಿ. ಅಲ್ಪ ದಾದ ಮಲ್ಪುನು, ಜನ ಬರುವೆರಾ, ದಾದಾ ನಿರ್ಣಯ ಮಲ್ಪುನು ಪನ್ಪಿನ ಪ್ರಶ್ನೆ ಎಂಕಲ್ಡ ಇತ್ತ್ಂಡ್. ಎಂಕ್ ಒಂಜಿ ತುಳು ಸಂಘ ಮಲ್ತ್ ಗೊತ್ತು ಇತ್ತಿನೇರ್ದಾವರ ಯಾನ್ ಅರೆಡ ಪಂತೆ... ನಮ ಒಟ್ಟಾದ್ ತುಳುಕು ದಾದ ಮಲ್ಪೊಡಾಂಡ ಸಂಘ ಮಲ್ಪೊಡು. ಐಟ್ ಇತ್ತೆದ ಯುವ ಪೀಳಿಗೆ‌ ಉಪ್ಪೊಡು.

ಸರಿ ಅಂಚಾಂಡ ಪುದರ್ ದಾದ ದೀಪಿನಿ? ಪನ್ಪಿನ ಪ್ರಶ್ನೆಗ್ ಎನ್ನ ಮನಸ್‌ಡ್ ಇತ್ತಿನಿ ಒಂಜೇ...  ಅವು ದಾದ ಪಂಡ "ಕೂಟ, ಚಾವಡಿ, ಒಕ್ಕೂಟ, ಸಂಘ" ಇಂಚ ಮಾತ ಪುದರ್ ದೀಂಡ ಜವನೆರ್ ಅವೆನ್ ದೆತೊನುಜೆರ್. ಅಂಚ ಒಂಜಿ ದೀಪಿನೇ ಬೊಡ್ಚಿ. ದಾದಾಂಡಲಾ ಒಂಜಿ ಡಿಫೆರೆಂಟ್ ಆದ್ ಉಪ್ಪಡ್. ಪುದರ್ ತೂದೇ ಸಂಘಗ್ ಸೇರುನ ಮನಸ್‌ ಆವೊಡು. ಬೊಕ್ಕ ಅವು ಮಾತೆರ್ನಲಾ ಮನಸ್‌ಡ್ ಒರಿಯೊಡು, ಒಂಜಿ ಜೋಶ್ ನಿರ್ಮಾಣ ಆವೊಡು ಪನ್ಪಿನ ವಿಚಾರ ಯಾನ್ ದುಂಬು ದೀಯೆ. ಉಂದೆಕ್ ಎನ್ನ ದುಂಬುರ್ದೇ ಯೋಚನೆ ಇತ್ತಿನಿ "ಜೈ ತುಲುನಾಡ್ (ರಿ.)" ಪನ್ಪಿನ ಪುದರ್. ಐತ ದುಂಬು ಪಿರ "ಕೂಟ, ಚಾವಡಿ, ಒಕ್ಕೂಟ, ವೇದಿಕೆ,‌ ಸೇನೆ " ಇಂಚ ದಾಲ ಬೊಡ್ಚಿ.  "ಜೈ ತುಲುನಾಡ್" ಪಂದೇ ಉಪ್ಪಡ್ ಪಂದ್. ಪ್ರಶಾಂತ್ ಸಾಲ್ಯಾನೆರ್‌ಲಾ ಈ ವಿಚಾರೊಗು ಒಪ್ಪಿಯೆರ್. 10 ಆಗಸ್ಟ್ 2014ಗ್ ನಿಗಂಟ್ ಮಲ್ದಿನ 

ಕೂಡು ಪಟ್ಟಾಂಗಡ್ ಸಂಘಗ್ ಈ ಪುದರ್ ಅಂತಿಮ ಮಲ್ಪೊಡು ಪಂದ್ ಸುರುವೆ ತೀರ್ಮಾನ ಮಲ್ತ್ ಇತ್ತ. ಕೂಡು ಪಟ್ಟಾಂಗೊಗು ಪ್ರಚಾರ ಸುರು ಮಲ್ತ.

*ಸುರುತ್ತ ಕೂಡು ಪಟ್ಟಾಂಗದಾನಿ*

10 ಆಗಸ್ಟ್ 2014

ಅಂತೂ ಕೂಡುಪಟ್ಟಾಂಗ ನಿಗಂಟ್ ಆಯಿನ ದಿನ ಬತ್ತ್ಂಡ್. ಸತ್ಯ ಪನೊಡಾಂಡ... ಕೂಡುಪಟ್ಟಾಂಗಗ್ ಸಭಾಂಗಣ ಬುಕ್ ಮಲ್ಪುಗ ಪಂಡ ಕೊರಿಯೆರ್ ಕಾಸ್ ಇತ್ತಿಜಿ. ಅಪಗತೇ ಎನ್ನ ಎಜುಕೇಷನ್ ಮುಗಿದ್ ಲೈಫ್ ಅಲ್ಲೋಲ ಕಲ್ಲೊಲಡ್ ಇತ್ತ್ಂಡ್😂 .

ಆಂಡ ತುಳುರಾಜ್ಯ ಪೊರ್ಂಬಾಟದ ಮಲ್ಲ ಪುದರ್ ಹರಿಕೃಷ್ಣ ಪುನರೂರು ಮೇರ್ನ ಮಗೆ ದೇವಪ್ರಸಾದ್ ಪುನರೂರು ಎಂಕ್ ಗುರ್ತ ಇತ್ತೆರ್. ತುಳು ವಿಚಾರೊಡು ಆರ್ ಎಂಕ್ ದುಂಬುರ್ದಿಂಚಿಲಾ ಬೆರಿತಾಂಗ್ ಕೊರೊಂದು ಇತ್ತೆರ್. ಅಂಚಾದ್  ಕೂಡುಪಟ್ಟಾಂಗ ಮಲ್ಪರೆ ಆರ್ ಮುಲ್ಕಿದ ಸ್ವಾಗತ್ ಹೊಟೇಲ್‌‌ಡ್ ಅನುವು ಮಲ್ತ್ ಕೊರಿಯೆರ್.  ಅಂಚಾದ್ ಕೂಟದ ಸುರುತ್ತ ಕೂಡುಪಟ್ಟಾಂಗ 10 ಆಗಸ್ಟ್ 2014ಗ್ ಮುಲ್ಕಿದ ಸ್ವಾಗತ್ ಹೋಟೆಲ್‌ಡ್ ನಡಪುಲಕ ಆಂಡ್. 

ಸಾಮಾಜಿಕ ಜಾಲತಾಣೊಡು ಪಾತೆರುನಕಲ್ನ ಸಂಖ್ಯೆ ಜಾಸ್ತಿ ಇತ್ತ್ಂಡಲಾ ಸುರುತ್ತ ಕೂಡುಪಟ್ಟಾಂಗಗ್ ಬೈದಿನಕಲ್ನ ಸಂಖ್ಯೆ ಕಾಲಿ 9 🥲. ಎನ್ನ ಯೋಚನೆ ಸರಿ ಇತ್ತ್ಂಡ್ ರಾಜಕೀಯ ಪಕ್ಷ, ಧರ್ಮ, ಜಾತಿ ವಿಚಾರ ಬುರ್ದು ಜನ ತುಳುತ್ತಂಚಿ ಬರ್ಪುಜೆರ್. ಖಾಲಿ 9 ಜನ ಬನ್ನಗ ಕೂಟ ಮಲ್ಪೊಡಾ? ಮಲ್ತ್ಂಡ ದುಂಬಗ್‌ಲಾ ಇಂಚೆನ್ 9-10 ಜನ ಮಾತ್ರ ಬತ್ತ್ಂಡ ದಾದ ಮಲ್ಪುನು ಪನ್ಪಿನ ಯೋಚೆನೆಡೇ ಆನಿ ಮಸ್ತ್ ಬೇಜರ್‌ಲಾ ಆದ್ ಇತ್ತ್ಂಡ್. ಪಾಪ ಆರ್ ಬೊಂಬೈರ್ದ್ ಬೈದೆರ್. ಆಂಡ ಬರ್ಪೆ ಪನ್ತಿನ ಮಸ್ತ್ ಜನ ಬೇತೆ ಬೇತೆ ಕಾರಣ ಕೊರಿಯರೆ ಸುರು ಮಲ್ತೆರ್. ಈ ಕರ್ಮೊಗು ಮೀಟಿಂಗ್ ಬೋಡು ಇತ್ತ್ಂಡ ಪಂದ್ ಆಂಡ್...ಕೋಪಲಾ ಬರೊಂದು ಇತ್ತ್ಂಡ್. ಬೈದಿನ 9 ಜನ ಕಿರಣ್ ತುಲುವೆ, ಪ್ರಶಾಂತ್ ಸಾಲ್ಯಾನ್, ರಕ್ಷಿತ್‌ರಾಜ್ ಬಜಾಲ್,‌ ಅಜಿತ್ ಪೂಜಾರಿ, ಕೌಶಿಕ್ ಶೆಟ್ಟಿ, ಪ್ರವೀಣ್ ಉರ್ವ, ರೋಹನ್ ಬೊಕ್ಕ ಕುಡ ರಡ್ಡ್ ಜನತ ಪುದರ್ ನೆಂಪು ಇಜ್ಜಿ. ಆತ್ ಮಾತ ಪಂಡ್‌ದ್‌ಲಾ ಬೈದಿನಿ 9 ಜನ ಮಾತ್ರ ಪನ್ನಗ ಎಂಕಂತೂ ಕೋಪ ಬೈದಿನಿ ಪ್ರಶಾಂತ್ ಸಾಲ್ಯಾನೆರೆನ ಮಿತ್ತ್‌ಗ್. ದಾಯೆಗ್ ಪಂಡ ಯಾನ್ ಎನ್ನಾತಿಗೆ ಇತ್ತುದುವೆ. ಪೊಕ್ಕಡೆ ದಾದಾಂಡಲಾ ತುಳುಕು ಮಲ್ಪುಗ ಪಂದ್ ಸಂಘ ಮಲ್ಪರೆಗ್ ಅಪಗಪಗ ಕಾಲ್ ಮಲ್ತ್ ಪನೊಂದಿತ್ತೆರ್. ಇತ್ತೆ ಮೂಲು ತೂನಗ 9 ಜನ ಬೈದಿನಿ. ಬೋಡಾ ಸಂಘ? 

ಆಯಿನ ಆಂಡ್.. ಈತಾಂಡಲಾ ಬೈದೆರತ್ತ  ಪಂದ್ ಎನ್ನ್‌ದ್ ಕೂಡು ಪಟ್ಟಾಂಗ ಮಲ್ತ. ಐಟ್ ಕೂಟ ಮಲ್ಪುನ ಬಗ್ಗೆಡ್ ಒಮ್ಮತದ ನಿರ್ಣಯ ದೆತೊಂಡ, ಕೂಟದ ಪುದರ್ "ಜೈ ತುಲುನಾಡ್" ಪಂದ್ ದಾಯೆಗ್ ದೀಪಿನಿ ಪನ್ಪಿನೆತ ಮಾಹಿತಿ ಕೊರ್ದು, ಪುದರ್ ಅಂತಿಮ ಮಲ್ತ್ ಬುಡಿಯ.... ಅವೆರ್ದ್ ಬೊಕ್ಕ ಕೂಟೊನು ನೋಂದಾವಣಿ ಮಲ್ಪುನ ಬಗೆಟ್‌ಲಾ ತಿರ್ಮಾನ ಮಲ್ತ....

ಕೂಡು ಪಟ್ಟಾಂಗ ಆದ್ ಒಂತೆ ಸಮಯೊರ್ದು ಬೊಕ್ಕ 9 ಜನಟ್ ಕುಡ ಕೆಲವೆರ್ ಓಲು ಪೋಯೆರ್ ಪಂದ್ ಗೊತ್ತಾಯಿಜಿ..😁

ಉಂದು ಜೈ ತುಲುನಾಡ್ (ರಿ.) ಕೂಟ ಸುರು ಆಪಿನೆರ್ದ್ ದುಂಬು ನಡತ್ತಿನ ಕಥೆ ವ್ಯಥೆ

(2014 ಮುಟ್ಠ ನಡತ್ತಿನ ವಿಚಾರೊನು ನಿಕ್ಲೆನ ದುಂಬು ದೀತೆ)

ಬರವು : ಕಿರಣ್ ತುಲುವೆ